分散投資

小幽生看過一些財經書籍, 上網亦有看過一些文章, 有建議投資者應集中持投, 手中股票不應超過5隻, 亦有建議散戶應分散投資, 不應將雞蛋放在同一個籃中......

小幽生主張後者, 手上持股現時亦超過25隻; 主因小幽生鐘意就買, 不做功課, 如集中投資, 很容易中伏而身首異處......分散投資就算小注買中老千股, 亦不至於拖跨整個投資組合! 小幽生跟很多散戶一樣, 鐘意人買乜就買乜, 亦曾買過老千股; 小幽生現時亦手持一隻, 記得當初睇無記財經豆豉的中資高瘋會環節推介, 覺得前景美好, 於是買入; 買入後, 股價節節下跌, 不止蝕, 董事跳船, 亦不止蝕, 直到最後停牌被查,  輸足90%, 到現在仍未復牌! 以後有機會再分享!

雖然遇上以上經歷, 亦無損小幽生心情, 旅行照去, 飯照食, 野照買! 全因分散投資可減低損失, 心想強如歐洲股神安東尼．波頓亦買下霸王損手, 作為散戶的我亦無需灰心! 繼續鐘意就買!

仔仔的利是錢

仔仔今年第一次收到利是錢, 連同之前滿月所收的利是錢, 大概萬餘圓吧, 小幽生打算幫佢買晒股票收息, 好過放銀行冇息收啦!

心目中打算買入中行或工行, 平嘛, 幾千蚊有1手; 雖然報紙成日話乜野地方債影響內銀, 一陣又話佢升得慢, 小幽生唔明咁多, 鐘意就買, 國企, PE7,8倍, 股息4厘幾, 買入長渣, 冇得輸啦! 我就唔信十年後會低過現價呀! 冇必要同我講匯豐思捷電盈等的故事, 總之, 一於懶理, 買左先算啦!

物業投資之我見

生活在澳門的小幽生, 其實更偏好買樓買車位收租, 原因是澳門人有錢了, 個個後生仔唔洗讀書都月入兩萬左右, 閒錢多了, 就想買車, 但車位卻越來越少, 公共停車場長期泊滿; 因此, 個人認為車位投資是穩陣收租之選!

另外, 買樓買車位可做按揭, 有槓杆效果; 小幽生更偏好於現時低息環境下, 有幾多借幾多; 另外, 澳門不像香港有中央資料庫, 只要你唔講, 銀行唔會知你的借貸情況, 但相信此情況, 將來必會有所改變, 到時你想借錢買多個物業就冇咁容易! 所以小幽生的按揭貸款遍佈各大小銀行, 後生唔博等待何時呢?

眼下身邊比小幽生稍為年長之輩, 月收入比小幽生多出何止一萬幾千, 但每每談到物業投資, 就叫人小心會跌, 小心加息, 小心超過供樓超過月收入幾多幾多等; 亦常常表示以前邊度邊度賣唔洗一百萬, 我無買之嘛云云; 結果大升浪沒有參與其中, 就連換樓都沒有, 只有自住樓一間, 表示心滿意足, 自我安慰...

小幽生一於懶理, 我行我素, 人買我又買, 買左先算啦!

投資概況

小幽生04年因打算結婚, 於是兩公婆買下一層唐樓, 之後有買有賣, 現有車位收租, 單位收租, 人民幣存款; 股票投資約佔整個組合的10%~15%。

股票組合中, 股票數目維持在20 ~ 30+隻左右, 當中藍籌為主要持股, 其他的股, 千奇百怪乜都有, 甚至被停牌, 唔知有冇機會復牌的都有! 有機會再談談手中的各種持股。

什麼不買?

小幽生係又買唔係又買, 到底有無什麼投資產品不買呢?

有! 牛熊證, 窩輪, 期權等衍生工具小幽生都唔買, 因為07年全民皆股時, 小幽生亦跟其他散戶一樣, 難敵人人有錢賺的誘惑, 初次涉足股壇! 初黎步到, 人人都話買輪, 咁咪買囉! 渣住本"經一", 封面話買邊隻咪買邊隻囉! 我都唔係乜都唔識架, 想升賺錢買CALL, 想跌賺錢買PUT嘛! 起初都有賺都一千幾百, 到後來港股直通車叫停, 港股開始步入熊市; 當時小幽生當然乜都唔知, 心諗好快會調頭挑戰40000點, 結果當然係輸錢收場啦!

最令小幽生不解的, 就係我明明買工行CALL, 點解工行有時升, 我隻輪唔升? 工行跌, 佢就跌多幾倍? 升唔見佢有槓杆, 跌果陣時就有囉! 另外小幽生亦曾試過渣住隻輪諗住同佢鬥長命, 結果到期前1個月, 無輪正股升幾多, 我隻輪都係唔郁, 咁都得!? 依家先明白原來升跌都控制在庒家手中, 難鸁過買大細!

自此以後, 小幽生就唔再買各種衍生工具了......

序

小幽生, 茫茫人海中的一員, 典型散戶一名; 不懂基礎分析, 看年報看不到3分鐘; 不懂技術分析, 看圖會加入個人主觀願望; 止賺止蝕沒有紀律, 純粹個人心情, 有時短炒變長渣, 長渣又變短炒; 喜歡係又買, 唔係又買; 藍籌又買, 仙股又買, ETF又買; 報紙推介又買, 朋友收到風又買; 人民幣又買, 車位又買, 單位又買; 總之, 唔理咁多, 鍾意就買, 買左先算啦!

本網誌紀錄小幽生的投資心路歷程, 生活點滴, 看看本末倒置, 不做功課去投資的我, 會有什麼下場......